Að byrja

Hér eru svör við algengustu spurningum og afsökunum þeirra sem eru ekki byrjaðir.

Hvernig á ég að hafa efni á hjóli?

Það þarf ekki merkilegt hjól í þetta! Landið er stútfullt af lítið notuðum hjólum sem eru meira en nógu góð fyrir þig. Kíktu niður í geymslu, þú gætir átt 1 eða 2 sjálfur! Fjallahjólið í geymslunni, gamla 10 gíra hrútastýrishjólið eða 3ja gíra DBS hjólið hennar mömmu, þetta dugar til að byrja með! Það þarf að pumpa í dekkin, smyrja keðjuna og athuga að bremsurnar séu í lagi og hjóla af stað! Ef ekki, er hægt að finna ódýr notuð hjól (t.d. í hjólabúðum, á netinu, Sorpu, á uppboði hjá Löggunni, osfrv.).
Ef fleiri en eitt hjól koma til greina er það stærðin á stellinu sem er mikilvægasta atriðið til að hafa í huga þegar valið er úr. Ekki rjúka til og kaupa dýrt hjól fyrr en þú hefur reynslu af því að hjóla í vinnuna því það er alls ekki auðvelt að velja sér rétt hjól til lengri tíma.
Hér er ítarlegri umfjöllun um val á hjóli.

En þetta er svo erfitt!

Byrjaðu rólega með því að hjóla bara aðra leiðina eða annan hvern dag eða hálfa leið og auka svo vegalengd og/eða tíðni seinna. Þetta er léttara en þú heldur, gefðu þér bara tíma til að hjóla rólega og njóta lífsins. Pumpaðu svo vel í dekkin, það auðveldar hjólreiðarnar mjög mikið. Hámarksþrýstingur í hjóladekkjum er venjulega a.m.k. 65 pund (stendur á dekkinu). Til viðmiðunar er algengur þrýstingur í bíldekki 26-32 pund.

Hvaða leið á ég eiginlega að hjóla?

Ekki hugsa eins og þú gerir þegar þú ert á bíl, veldu frekar rólegar og fáfarnar götur og stíga þar sem er minna um bíla og betra skjól.
Það er mikið öruggara og betra að hjóla á götunni þar sem lítil umferð er heldur en að vera á gangstéttinni við stórar umferðargötur. Það er um að gera að prófa fleiri en eina leið (jafnvel þó þær séu aðeins lengri en sú stysta) og það er upplagt að fara mismunandi leiðir eftir veðri eða eftir því í hvernig skapi þú ert.
Vertu búinn að prófa a.m.k. eina leið eftir vinnu eða á frídegi áður en þú ferð í fyrsta skipti á hjóli í vinnuna. Þá gerir þú þér betur grein fyrir því hversu lengi (fljótur) þú ert á leiðinni og áttar þig á því hvort þú svitnar mikið á leiðinni (þá getur þú gert ráðstafanir).
Hér er ítarlegri umfjöllun um leiðarval.

Hvernig á ég að klæða mig?

Þér hitnar við að hjóla. Mismikið þó eftir því hversu mikið þú reynir á þig. En þú þarft ekki að vera mjög mikið klæddur. Það þarf heldur ekki einhvern sérstakan „hjólafatnað“ eða „útivistarfatnað“.
Gallabuxur eru þó verstu hjólabuxurnar að mínu mati. Mörgum þykir gott að skipta um a.m.k. buxur og bol þegar komið er í vinnuna. Prófaðu þig áfram, það er mjög persónubundið hvað virkar.
Íþróttabuxur af einhverju tagi, þunn peysa eða síðerma bolur, eitthvað þunnt og vindhelt og þunnir fingravetlingar dugar mér frá byrjun maí fram í október. Ef þú þarft eitthvað hlýrra er betra að bæta við öðrum bol eða annari þunnri peysu en að fara í þykka úlpu eða flíspeysu.
Settu buxnaskálmarnar ofan í sokkana ef þú ert ekki með keðjuhlíf. Gleymdu bara ekki að taka buxurnar uppúr aftur þegar þú ert kominn í vinnuna😉
Hér er ítarlegri umfjöllun um klæðnað.

En ég svitna svo rosalega, hvað geri ég í því?

Flestir svitna eitthvað þegar þeir hjóla og sumir halda jafnvel að það sé eitthvað vandamál. Þau vandamál er þó yfirleitt hægt að leysa, hér eru nokkur ráð til þess að sviti haldi ekki aftur af þér.

Fyrir flesta er þetta ekkert vandamál, prófaðu að hjóla bara rólega, taka þér tíma í þetta. Fyrir þá sem svitna lítið dugar oft að fara bara í sturtu heima áður en lagt er af stað og leyfa svitanum svo bara að þorna eftir að komið er í vinnuna. Það kemur engin svitalykt þó hreinn líkami svitni pínu (það getur verið sniðugt að fá staðfestingu á þessu frá einhverjum samstarfsmanni sem er hreinskilinn og með gott lyktarskyn).

Það er hægt að fara í sturtu þegar komið er í vinnuna. Ef það er sturta á vinnustaðnum, sundlaug eða líkamsræktarsalur í nágrenninu er það fyrirtaks ráð.
Að þrífa sig inni á baði í vinnunni og skipta um blaut föt (sniðugt að bíða fyrst í nokkrar mínútur svo þú sért hættur að svitna). Vaskur og þvottastykki eða handþurrkur duga. Sumir nota blautþurkur (sem ætlaðar eru til þess að þrífa bossana á smábörnum, þessar frá Neutral eru án ilmefna). Ef þú vilt ekki bera með þér föt á hverjum degi er hægt að fara með vikuskammt í einu.
Hér gildir það sama og í mörgu öðru, lausnirnar eru persónubundnar og menn verða að prófa sig áfram, langflestir geta leyst þetta á auðveldan hátt.
Hér er meira um þetta efni.

Hvar á ég að geyma hjólið í vinnunni?

Best er að koma hjólum í innanhússgeymslu. Á mörgum vinnustöðum eru einhverjir staðir þar sem hægt er að koma hjólinu fyrir inni án þess að það sé fyrir öðrum. En sem betur fer er ekki mikið um það á Íslandi að hjólum sé stolið ef þeim er þokkalega læst. Því er hægt að geyma hjól nánast allsstaðar fyrir utan vinnustaði. Þeir sem eiga fín og dýr hjól gætu líka komið sér upp öðru ódýru (gömlu en vel nothæfu) hjóli til að nota í þetta svo það sé ekki jafn mikið mál að skilja það eftir fyrir utan.

Já, en er þetta ekki stórhættulegt?

Hjólreiðar eru ekki hættulegar! Það mikið hættulegra heilsunni að keyra í vinnuna en að hjóla í vinnuna!
Það er margt sem maður getur gert til þess að minnka slysahættuna. Þar gildir að vera með hjálm á hausnum, passa að hjólið sé ekki hættulegt (bremsur í lagi og stellið heilt), fylgja umferðarreglum og fylgjast vel með því sem er að gerast í kringum mann.

En ég get ekki hjólað því hárið fer í klessu undan hjálminum!

Slepptu þá hjálminum. Það er hættulegra að hjóla ekki en að hjóla hjálmlaus. Auðvitað gætir þú líka greitt þér eftir að þú kemur í vinnuna, en það er nú svolítið vesen, eða hvað?

Hér getur þú komið með þínar eigin spurningar og fengið svar um hæl!

  1. Engar athugasemdir ennþá.
  1. febrúar 11, 2010 kl. 9:39 f.h.
Lokað er á athugasemdir.
%d bloggers like this: